Петропавлдағы Қазақстан Конституциясы көшесін жаңарту жұмыстары аяқталды. Басты көше қайта жаңғырып, заманауи әрі жайлы қоғамдық кеңістікке айналды. Жоба аясында жарық шамдары толық ауыстырылып, бедерлі тас төселді, сондай-ақ амфитеатр мен заманауи абаттандыру элементтері орнатылды. Көптен күткен субұрқақ та іске қосылды. Барлық жұмыс қалалық дизайн-код талаптарына сай жүзеге асырылған. Атқарылған жұмыстың сапасын облыс әкімі Ғауез Нұрмұхамбетов барып көрді.
– Су аркаларымен жабдықталған субұрқақ «Taза Қазақстан» ұлттық жобасы аясында атқарылған жұмыстың бір бөлігі және қала тұрғындары үшін ерекше демалыс орнына айналды. Бұдан бөлек, экологиялық мәдениетті қалыптастыру мақсатында көшеге пластик бөтелкелерді қабылдайтын фандоматтар орнатылды.
Тұрғындар бос пластик ыдысты өткізіп, арнайы бонус жинау мүмкіндігіне ие. Бұл бастама қала тазалығын сақтап қана қоймай, халықты тұрмыстық қалдықтарды қайта өңдеуге ынталандырады, – деді өңір басшысы.
Қазақстан Конституциясы көшесінің абаттандырылуы – қаланы көркейтуге бағытталған ауқымды жұмыстың бастамасы ғана. 2025 жылы қалада 15 шағынаудандағы 50 аула жаңартылып, тұрғындар үшін қолайлы жағдай жасалды. Сонымен қатар демалыс пен серуенге арналған 74 жаңа сквер пайда болды. Бұл жұмыстардың барлығы қала келбетін жақсартуға, тұрғындардың өмір сүру сапасын арттыруға және Петропавлды заманауи әрі жайлы шаһарға айналдыруға бағытталған. Жергілікті билік өкілдерінің айтуынша, қаланы көркейтуге бағытталған жүйелі жұмыстар алдағы уақытта да жалғаса бермек.
Ақерке ДӘУРЕНБЕКҚЫЗЫ,
«Soltüstık Qazaqstan».
Суретті түсірген
Шыңғысхан БЕКМҰРАТ.